Kuvendi i Shqipërisë ka zgjedhur sot Endrit Shabanin në postin e Avokatit të Popullit.
Kandidatura e tij u miratua me 85 vota pro, ndërsa 3 votuan kundër. Abstenime nuk pati.
Procesi i votimit u zhvillua pa praninë e opozitës, e cila braktisi sallën përpara nisjes së procedurës, duke kundërshtuar mënyrën e përzgjedhjes së kandidatit.
Ndërkohë, i pranishëm në sallë në orët e vona ishte edhe kryeministri Edi Rama.
Kujtojmë se jashtë Kuvendit, më heret kreu i PD Sali Berisha ka akuzuar mazhorancën se po rrëmben Avokatin e Popullit.
Opozita i kishte tërhequr firmat për Shabanin dhe disa kandidatë të tjerë dhe kërkoi që si emra të propozuar prej saj të kalonin në votim vetëm Besim Ndregjoni dhe Adriana Kalaja gjë e cila nuk është pranuar nga mazhoranca.
Nga ana tjeter, PS pretendoi se tërheqja e firmave ishte bërë përtej afateve ligjore dhe nuk ishte e vlefshme.
