Nga Nini Dede
Jemi në prag të hapjes së fushatës elektorale të zgjedhjeve parlamentare 2025 dhe thesi i premtimeve me 2025 gënjeshtrat e 12 viteve qeverisje, duket se nuk është mbushur as në çerekun e tij!
Kalendari i çdo viti është kthyer në 365 ditë të njëjta, ku 1 Prilli i çdo ditë ka prodhuar aq shumë gënjeshtra elektorale sa në 12 vjet duket sikur janë krijuar mijëra shatërvanë. Nuk bëhet fjalë për shatërvanë uji të pijshëm 24 orësh, se atë e realizoi që në mandatin e parë qeverisës pas 2013-ës.
Bëhet fjalë për shatërvanë gjigantë gënjeshtrash të zbukuruar me dritat shumëngjyrëshe të ndjenjave bizare-pseudopatologjike teatrale të dashurisë, keqardhjes, krenarisë, përuljes, ironisë e cinizmit meskin primitiv ndaj një populli pseudo të pafajshëm!
Them pseudo të pafajshëm sepse ky popull nuk mërzitet aspak kur laget në mënyrë të vazhdueshme nga ky ujë “i bekuar” i udhëheqjes së “shenjte” 12-vjeçare!
Currilat e fundit madje ishin të nxehta dhe i përvëluan 3 herë brenda një viti kur edhe pse me çmimet stratosferike të një tregu të çrregullt e të shformuar LAVANTERIK të shit-blerjes së banesave, “besimtarët” e shkretë të ujit “të bekuar”, prisnin procesin e rivlerësimit hipotekor 5% të dëgjuar e të parë me zë e figurë nga vetë goja e një burri shteti të rrallë si ai i cili përcaktoi edhe muajin fiks kur do të fillonte!
Thonë që burri fjalën ka!
Thonë edhe që besa e shqiptarit është e shenjtë! Por buri në fjalë nuk ka asnjërën nga të dyja, madje në gjykimin tim, as identitetin e të qenit shqiptar.
E dini pse?
Sepse shumica e shqiptarëve ikën vetë në BE, nga sytë këmbët të përvëluar nga uji i nxehtë i bekuar, kurse ata që kanë ngelur në Shqipëri (me ëndrrën vrastare të një banese që nuk e blenë dot kurrë), edhe pse me plagë flluskash djegie mbi lëkurë, shpresojnë të futen në BE: Krenarë por të pastrehë…!
