Teksa protestat kundër qeverisë kanë hyrë sot në ditën e 26-të dhe qytetarët vijojnë të kërkojnë dorëheqjen e kryeministrit Edi Rama, kreu i qeverisë ka zgjedhur të provokojë në rrjetet sociale.
Pasditen e kësaj të enjteje, Rama ndryshoi fotografinë e profilit dhe imazhin e kopertinës në Facebook, duke vendosur flamingot, simbolin që është identifikuar me protestën e nisur fillimisht për mbrojtjen e zonës së Zvërnecit dhe Nartës.
Lëvizja e kryeministrit u komentua menjëherë nga ndjekësit e tij, ndërsa postimet dhe profili i tij u mbushën me komente kritike nga qytetarë që e akuzojnë për përpjekje për të përvetësuar simbolin e protestës.
Shumica prej tyre i kërkojnë dorëheqjen dhe të marrë përgjegjësitë si kreu i shtetit, kur populli i tij derdhet në rrugë kundër qeverisjes së tij.
