Fletët e votimit dhe zarfet për zgjedhjet parlamentare të 11 Majit kanë mbërritur në ambientet e Parkut Olimpik, në sallën sportive “Fetih Borova”, ku do të qëndrojnë deri në fillimin e procesit të mbushjes së zarfeve. Materialet zgjedhore, të prodhuara në Slloveni, do të përdoren për të mundësuar pjesëmarrjen e votuesve nga jashtë, dhe mbushja e zarfeve do të nisë të mërkurën.
Përveç fletëve të votimit, zarfeve do t’u bashkangjitet edhe udhëzuesi i hartuar nga Komisioni Qendror i Zgjedhjeve për të informuar votuesit mbi mënyrën e saktë të votimit. I gjithë procesi do të monitorohet nga kamera dhe do të transmetohet live në faqen zyrtare të KQZ.
Komisioneri Shtetëror i Zgjedhjeve, Ilirjan Celibashi, ka njoftuar se për shqiptarët që jetojnë në Europë, zarfet me fletët e votimit do të mbërrijnë nga data 15 deri më 22 Prill, ndërsa për ata që jetojnë në kontinentet e tjera, zarfet do të arrijnë nga data 15 deri në 25 Prill.
Celibashi ka theksuar se çdo votues nga jashtë do të ketë vetëm tre ditë kohë për të shprehur vullnetin e tij dhe për ta dërguar përsëri zarfin me të njëjtën kompani postare, pa paguar asnjë tarifë, pasi të gjitha kostot mbulohen nga KQZ.
