Kryetari i Partisë Demokratike, Sali Berisha, ka mohuar kategorikisht mundësinë e krijimit të një koalicioni me Partinë Socialiste pas zgjedhjeve parlamentare të 11 majit. Në një intervistë në emisionin “NOW” me Erla Mëhillin, Berisha theksoi se, pavarësisht angazhimit për integrimin e Shqipërisë në Bashkimin Europian, ai nuk do të pranonte asnjëherë një koalicion me PS-në.
“Për integrimin e Shqipërisë, ne votojmë çdo ligj dhe marrëveshje, por kurrë një koalicion të përbashkët me PS-në,” deklaroi Berisha.
Gjithashtu, lideri i PD i hodhi poshtë premtimet e PS-së si kopje të programit të opozitës dhe e mohoi kategorikisht mundësinë e një qeverie të përbashkët me PS-në. “Nuk mund të ketë kurrë koalicion me Edi Ramën, këtë e them me bindjen absolute,” shtoi ai.
Sa i përket sistemit të drejtësisë, Berisha shprehu shqetësim për kohëzgjatjen e proceseve ligjore, duke theksuar se një proces civil mund të zgjasë deri në 15 vjet, gjë që, sipas tij, është më e keqe se në diktaturën komuniste.
Në lidhje me zgjedhjet e 11 majit, Berisha njoftoi se PD-ja ka krijuar koalicionin më të madh opozitar, duke përfshirë aleatë të ndryshëm. Ai theksoi se PD-ja do të dorëzojë marrëveshjen e koalicionit në Komisionin Qendror të Zgjedhjeve në mesnatë dhe se negociatat me aleatët, përfshirë Idrizin, vijojnë. Berisha gjithashtu theksoi se lista e kandidatëve për deputetë do të përfshijë si burra edhe gra, duke reflektuar diversitetin e koalicionit.
