Gjykata Kushtetuese doli me një vendim për çështjen e Erion Veliajt duke i dhënë të drejtë të vijojë detyrën si kryetar i Bashkisë së Tiranës. Gjykatësit kanë vendosur 5 me 3 në favor të tij.
Në këtë mënyrë rrëzohet vendimi i qeverisë që e shkarkonte nga posti pas propozimit që i kishte bërë Këshilli Bashkiak i Tiranës.
Dhënia e këtij vendimi do të thotë po ashtu se në kryeqytet nuk do të zhvillohen zgjedhje, duke e bërë edhe dekretin e presidentit Bajram Begaj të pavlefshëm.
I pari që e komentoi këtë vendim ishte kreu i Partisë Demokratike, Sali Berisha, i cili e mësoi gjatë një prononcimi për gazetarët.
Sipas tij, gjykatësit zbatuan ligjin, por njëkohësisht e sheh atë edhe si dhuratë të Ramës ndaj Veliajt teksa nuk mungojnë akuzat ndaj kryeministrit dhe presidentit Bajram Begaj.
“Me këto ai i dha Erion Veliajt avantazhin e sotëm de facto. Nuk ka moral se Haram Begaj dhe Edi Rama janë të palosur që të dy, janë të rrëzuar me këtë vendim”, tha Berisha.
Kujtojmë se qeveria e shkarkoi Veliajn më 25 shtator, duke u mbështetur në nenin 62 të ligjit “Për vetëqeverisjen vendore”, pasi ai nuk ishte paraqitur në detyrë për më shumë se tre muaj.
Më 31 tetor, në Gjykatën Kushtetuese u zhvillua seanca maratonë për shqyrtim e ankimimit të tij, e cila zgjati 7 orë.
Në sallën e gjyqit Veliaj, qeveria dhe presidenca dhanë argumentet e tyre. Kjo ishte njëkohësisht hera e parë që Veliaj shfaqej në publik pas arrestimit më 10 shkurt, këtë herë me pranga në duar.
