Kreu i Ballit Kombëtar Demokrat, Artur Roshi, ka reaguar pas një mesazhi të fortë të shpërndarë nga Ambasada Amerikane në Tiranë, duke e cilësuar atë si një tjetër goditje ndaj qeverisë shqiptare, që vjen nga partneri strategjik, SHBA.
Në postimin e bërë në FB, Roshi shkruan se ky është një sinjal i dytë që vjen nga Uashingtoni, por këtë herë më i drejtpërdrejtë dhe më i thellë në përmbajtje.
“Amerika rrit hendekun e ndarjes mes dy botëve – asaj të vlerave të lirisë dhe asaj të globalizmit konformist, pas të cilit fshihet shtypja e fjalës së lirë, kapja e medias, mungesa e zgjedhjeve të lira dhe emigrimi i nxitur nën maskën e krizës ekonomike”, shkruan kreu i PBKD.
Ai i referohet deklaratës së zyrtarit amerikan Samuel Samson nga Departamenti i Shtetit – Byroja për Demokraci, të Drejtat e Njeriut dhe Punën, ku theksohet se:
“Shtypja e fjalës, lehtësimi i emigrimit masiv, shënjestrimi i shprehjes së besimit dhe minimi i zgjedhjes elektorale kërcënojnë vetë themelet e partneritetit transatlantik.”
Roshi thekson se kjo deklaratë është një thirrje e qartë dhe një paralajmërim serioz, që nuk mund të mbulohet nga “analistët-borizanë të qeverisë”. Sipas tij, mesazhi vjen në mbështetje të filozofisë së lirisë dhe trashëgimisë konservatore amerikane, e përfaqësuar nga qasja e administratës Trump, dhe jo e një globalizmi që rrezikon vlerat themelore të demokracisë.
Amerika godet sërish qeverinë
Nëpërmjet një statusi të ambasadës amerikane dje, (të cilin do ta gjeni bashkëngjitur),Amerika godet sërish qeverinë pa ikur frekuenca e goditjes së parë që dukej si goditje pasive.
Nëpërmjet këtij mesazhi Amerika rrit hendekun e ndarjes së dy botëve, asaj të vlerave të lirisë që trashëgon amerika dhe përfaqëson filozofia konservatore e Trump dhe asaj të globalizmit konformist mbas të cilit fshihet shtypja e fjalës së lirë tërthorazi nëpërmjet kapjes së medias, mungesa e zgjedhjeve të lira nëpërmjet deformimit të vullnetit të votuesve, emigrimi masiv si një normalitet kur në fakt stimulon trafiqet nën petkun e emigrimit ekonomik.
Për kë bien këmbanat ? Nuk besoj se ka analist-borizan të qeverisë që e mbulojnë dot.
Le të bëjmë durim se “Amerika e madhe” do të jetë e tillë.
“Shtypja e fjalës, lehtësimi i emigrimit masiv, shënjestrimi i shprehjes së besimit dhe minimi i zgjedhjes elektorale kërcënojnë vetë themelet e partneritetit transatlantik.” – Samuel Samson nga U.S. Department of State: Bureau of Democracy, Human Rights, & Labor shkruan se si partneriteti ynë duhet të bazohet në trashëgiminë e përbashkët dhe jo në konformizmin globalist.
